INDvsPAK વિરાટ કોહલી એક દિવસીય આંતરરાષ્ટ્રીય ક્રિકેટમાં સૌથી ઓછી ઇનિંગ્સમાં 13,000 રન પૂરા કરનાર બેટ્સમેન બની ગયો છે. તેણે પોતાના આદર્શ ખેલાડી સચિન તેંડુલકરનો 19 વર્ષ જૂનો રેકોર્ડ તોડ્યો.
તે ODIમાં 13,000 રન પૂરા કરનાર વિશ્વનો પાંચમો અને ભારતનો બીજો બેટ્સમેન બની ગયો છે.
તેંડુલકર 16 માર્ચ 2004ના રોજ રાવલપિંડીમાં પાકિસ્તાન સામે આ સીમાચિહ્ન સુધી પહોંચનાર વિશ્વનો પ્રથમ બેટ્સમેન બન્યો હતો. તેણે 330 મેચની 321મી ઈનિંગમાં આ સિદ્ધિ મેળવી હતી, જ્યારે કોહલીએ 278મી મેચની 267મી ઈનિંગમાં આ સિદ્ધિ હાંસલ કરી હતી. સૌથી ઓછી ઇનિંગ્સમાં 8,000 રન, 9,000 રન, 10,000 રન, 11,000 રન અને 12,000 રન બનાવવાનો રેકોર્ડ પણ કોહલીના નામે છે.
આ સ્ટાર બેટ્સમેને એશિયા કપમાં પાકિસ્તાન સામેની મેચ દરમિયાન આ વિશિષ્ટ સિદ્ધિ મેળવી હતી. તેને આ મેચ પહેલા 13,000 રન પૂરા કરવા માટે 98 રનની જરૂર હતી અને તે તેની કારકિર્દીની 47મી સદી ફટકારવામાં સફળ રહ્યો હતો.
કોહલીએ તેની કારકિર્દીની 278મી મેચ રમીને સોમવારે તેની ઇનિંગ્સને આઠ રન સુધી લંબાવી હતી અને અણનમ 122 રન બનાવ્યા હતા. આ સમય દરમિયાન, તેણે ઈજામાંથી પરત ફરેલા કેએલ રાહુલ (અણનમ 111) સાથે ત્રીજી વિકેટ માટે 233 રનની અતૂટ ભાગીદારી કરી, જેના કારણે ભારત બે વિકેટે 356 રન બનાવવામાં સફળ રહ્યું.
કોહલી પહેલા તેંડુલકરે ભારત માટે વનડેમાં 13,000 રન પૂરા કર્યા હતા. તેંડુલકર આ ફોર્મેટમાં 18,426 રન સાથે સૌથી વધુ રન બનાવનારા બેટ્સમેનોની યાદીમાં ટોચ પર છે.
તેંડુલકર અને કોહલી સિવાય, શ્રીલંકાના કુમાર સંગાકારા (14,234) અને સનથ જયસૂર્યા (13,430) અને ઓસ્ટ્રેલિયાના ભૂતપૂર્વ કેપ્ટન રિકી પોન્ટિંગ (13,704)એ વનડેમાં 13,000થી વધુ રન બનાવ્યા છે.
18 ઓગસ્ટ, 2008ના રોજ દામ્બુલામાં શ્રીલંકા સામે વનડેમાં ડેબ્યૂ કરનાર કોહલીએ અત્યાર સુધી આ ફોર્મેટમાં 278 મેચોની 267 ઇનિંગ્સમાં 57.26ની સરેરાશથી 13,024 રન બનાવ્યા છે, જેમાં 47 સદી અને 65 અડધી સદીનો સમાવેશ થાય છે.
કોહલીએ શ્રીલંકા સામે સૌથી વધુ 2503 રન બનાવ્યા છે. તે પછી વેસ્ટ ઈન્ડિઝ (2261) અને ઓસ્ટ્રેલિયા (2172) આવે છે. તેણે સાત કેલેન્ડર વર્ષમાં 1,000થી વધુ રન બનાવ્યા છે.
તેના 13,000 રનમાંથી કોહલીએ ઘરની ધરતી પર 5,447 રન, વિરોધી ટીમના મેદાન પર 5,333 રન અને તટસ્થ સ્થળો પર 2244 રન બનાવ્યા છે. તેણે ઈંગ્લેન્ડમાં 1,349 અને ઓસ્ટ્રેલિયામાં 1,327 રન બનાવ્યા છે. આ ઇનિંગ દરમિયાન તેણે શ્રીલંકામાં વનડેમાં 1000થી વધુ રન બનાવવાનો રેકોર્ડ પણ બનાવ્યો હતો.
