ઇંગ્લેન્ડ સામેની શ્રેણી દરમિયાન પોતાની 100મી ટેસ્ટ રમનાર આર અશ્વિને ભારત માટે સૌથી ઝડપી 500 વિકેટ લેવાનું કારનામું કર્યું હતું. પૂર્વ ભારતીય ઓપનર કે શ્રીકાંતે રવિચંદ્રન અશ્વિન વિશે ખુલાસો કર્યો છે.
તેણે તેને એક શાનદાર ક્રિકેટર ગણાવ્યો અને કહ્યું કે તેના જબરદસ્ત આત્મવિશ્વાસની સાથે બીસીસીઆઈના ભૂતપૂર્વ પ્રમુખ એન શ્રીનિવાસનનો ટેકો તેની કારકિર્દીમાં મહત્વપૂર્ણ સાબિત થયો.
તમિલનાડુ ક્રિકેટ એસોસિએશન (TNCA) એ શનિવારે 100 ટેસ્ટ રમવા અને 500 વિકેટ પૂરી કરવા બદલ અશ્વિનનું સન્માન કર્યું હતું. આ અવસર પર શ્રીકાંતે કહ્યું, “જો અશ્વિને 100 ટેસ્ટ રમી છે અને 500 વિકેટ લીધી છે, તો તેના માટે ફક્ત એક જ વ્યક્તિ જવાબદાર છે અને તે અહીં મુખ્ય અતિથિ (એન શ્રીનિવાસન) તરીકે બેઠો છે. અશ્વિન માટે આ મોટી સિદ્ધિ છે. તેની સફળતાનું મુખ્ય કારણ તેનો આત્મવિશ્વાસ છે. શાબાશ અશ્વિન. અભિનંદન.”
મહાન ક્રિકેટર ગાવસ્કરે પણ આ ભારતીય સિનિયર ઓફ સ્પિનરની પ્રશંસા કરી હતી અને તેને એક તેજસ્વી ક્રિકેટર ગણાવ્યો હતો. ગાવસ્કરે કહ્યું, “હું અશ્વિનને 100 ટેસ્ટ રમવા અને 500 ટેસ્ટ વિકેટ લેવાની સિદ્ધિ પ્રાપ્ત કરવા બદલ અભિનંદન આપું છું. તેણે રમતના તમામ ફોર્મેટ, ખાસ કરીને ટેસ્ટમાં શાનદાર કારકિર્દી બનાવી છે. તેમને ભવિષ્ય માટે શુભકામનાઓ. અમને ખબર નથી કે તે ક્યારે નિવૃત્ત થશે પરંતુ તે ખૂબ જ તેજસ્વી ક્રિકેટર છે.
અશ્વિને તેની ઈન્ડિયન પ્રીમિયર લીગ (IPL) કારકિર્દીની શરૂઆત 2008માં ચેન્નાઈ સુપર કિંગ્સ (CSK) સાથે કરી હતી. તે 2015 સુધી આ ફ્રેન્ચાઇઝી સાથે રહ્યો અને બે ટાઇટલ જીત્યા. CSKની માલિકી ઇન્ડિયા સિમેન્ટની છે અને શ્રીનિવાસન કંપનીના મેનેજિંગ ડિરેક્ટર છે. અશ્વિનની ભારતીય ટીમ અને તમિલનાડુ ટીમના સાથી દિનેશ કાર્તિકે પણ ટેસ્ટમાં વિશ્વના નંબર વન બોલરની પ્રશંસા કરી અને તેને પ્રેરણારૂપ ગણાવ્યો.
