સુરેશ રૈનાની આગેવાની હેઠળની અર્બનાઇઝર્સ હૈદરાબાદે પ્રથમ ક્વોલિફાયરમાં મણિપાલ ટાઇગર્સને હરાવીને ફાઇનલમાં પોતાનું સ્થાન નિશ્ચિત કરી લીધું છે. સુરતના લાલાભાઈ કોન્ટ્રાક્ટર સ્ટેડિયમમાં રમાયેલી મેચમાં હૈદરાબાદે મણિપાલને 75 રનથી હરાવ્યું હતું.
હૈદરાબાદ ટીમની આ જીતમાં વેસ્ટ ઈન્ડિઝના પૂર્વ વિસ્ફોટક ઓપનર ડ્વેન સ્મિથે મહત્વની ભૂમિકા ભજવી હતી. સ્મિથે 42 બોલમાં સદી ફટકારીને રેકોર્ડ બુકમાં પોતાનું નામ નોંધાવ્યું હતું. સ્મિથે લિજેન્ડ્સ લીગના ઇતિહાસમાં સૌથી ઝડપી સદી ફટકારી હતી. તેણે 226.42ના સ્ટ્રાઈક રેટથી રન બનાવ્યા.
મણિપાલ ટાઈગર્સના કેપ્ટન મોહમ્મદ કૈફે ટોસ જીતીને રૈના અને કંપનીને પ્રથમ બેટિંગ કરવાનું કહ્યું હતું. અર્બનરાઇઝર્સ હૈદરાબાદ માટે ઓપનર ડ્વેન સ્મિથે 53 બોલમાં 14 ચોગ્ગા અને 7 છગ્ગાની મદદથી 120 રનની ઇનિંગ રમી હતી. તાજેતરમાં જ આંતરરાષ્ટ્રીય ક્રિકેટમાંથી નિવૃત્તિ લેનાર ભારતીય ઓલરાઉન્ડર ગુરકીરત સિંહે 26 બોલમાં 39 રન બનાવ્યા હતા જ્યારે રિકી ક્લાર્કે 19 બોલમાં 34 રન બનાવ્યા હતા. અસગર અફઘાને માત્ર 8 બોલમાં અણનમ 23 રન બનાવ્યા હતા. અર્બનાઇઝર્સ હૈદરાબાદે 6 વિકેટે 253 રનનો વિશાળ સ્કોર બનાવ્યો હતો.
254 રનના પહાડી ટાર્ગેટ સામે ટાઈગર્સ તૂટી પડ્યા હતા.
254 રનના ટાર્ગેટનો પીછો કરવા ઉતરેલી મોહમ્મદ કૈફની મણિપાલ ટાઈગર્સ ટીમ પહાડ જેવા ટાર્ગેટ સામે કચડાઈ ગઈ. મણિપાલની ટીમ પૂરી 20 ઓવર પણ બેટિંગ કરી શકી નહોતી. તેની તરફથી એન્જેલો પરેરાએ 30 બોલમાં 7 ચોગ્ગા અને 5 છગ્ગાની મદદથી 73 રન બનાવ્યા પરંતુ આ ઇનિંગ ટીમને મદદ કરી શકી નહીં. કેપ્ટન મોહમ્મદ કૈફ 14 બોલમાં 13 રન બનાવીને પેવેલિયન પરત ફર્યો હતો. મણિપાલ ટાઈગર્સની આખી ટીમ 178 રનમાં સમેટાઈ ગઈ હતી. અર્બનાઇઝર્સ હૈદરાબાદ માટે, વેસ્ટ ઈન્ડિઝના ભૂતપૂર્વ ઝડપી બોલર જેરોમ ટેલર અને પીટર ટ્રેગોએ સૌથી વધુ 3-3 વિકેટ લીધી હતી.
ક્વોલિફાયરમાં રૈના અને કૈફનું બેટ શાંત રહ્યું હતું
સુરેશ રૈનાની ટીમ ભલે જીતી ગઈ હોય પરંતુ આ મેચમાં તેનું બેટ શાંત રહ્યું હતું. રૈનાએ 4 બોલમાં 2 રન બનાવ્યા હતા. તે થિસારા પરેરાના બોલ પર વોલ્ટનના હાથે કેચ આઉટ થયો હતો. મણિપાલ ટાઈગર્સનો કેપ્ટન મોહમ્મદ કૈફ પણ બેટથી અપેક્ષા મુજબનું પ્રદર્શન કરી શક્યો નહોતો. કૈફ 14 બોલમાં 2 ચોગ્ગા સહિત 13 રન બનાવીને આઉટ થયો હતો. તેને સ્ટુઅર્ટ બિન્નીએ સુયલના હાથે કેચ આઉટ કરાવ્યો હતો.
