વરસાદના કારણે સતત વિક્ષેપ પડેલી મેચમાં ભારતે આખરે પાકિસ્તાન સામે મોટી જીત હાંસલ કરી હતી. આ જીતમાં ભારતના કિંગ કોહલીનું શાનદાર રૂપ જોવા મળ્યું હતું. ગઈ કાલે તેણે જે પ્રકારનું ક્રિકેટ રમ્યું તે વર્લ્ડ કપની દૃષ્ટિએ ભારત માટે સારી નિશાની છે.તેણે ગઈ કાલે પાકિસ્તાન સામે તેની 47મી સદી ફટકારી એટલું જ નહીં પરંતુ ઘણા રેકોર્ડ પણ પોતાના નામે કર્યા.
તેની સાથે 4 મહિના પછી પરત ફરેલા કેએલ રાહુલે પણ શાનદાર પ્રદર્શન કર્યું હતું. તો ચાલો તમને વીડિયો દ્વારા જણાવીએ કે ગઈકાલે વિરાટ કોહલીએ જે રેકોર્ડ બનાવ્યો હતો.
વાસ્તવમાં ગઈ કાલે ભારતે પાકિસ્તાન સામે 228 રનથી સૌથી મોટી જીત હાંસલ કરી હતી, જે પોતાનામાં એક મોટો રેકોર્ડ છે. ભારતની આ જીતમાં વિરાટ કોહલીની સાથે તમામ બેટ્સમેન અને બોલરોએ પોતાની તાકાત બતાવી હતી. સૌથી પહેલા કેપ્ટન રોહિત શર્મા અને શુભમન ગિલે મળીને પ્રથમ વિકેટ માટે 121 રનની ભાગીદારી કરી હતી. જે બાદ વિરાટ અને કેએલ રાહુલે સાથે મળીને 233 રનની અતૂટ ભાગીદારી કરી હતી. કેએલ રાહુલે 106 બોલમાં અણનમ 111 રન બનાવ્યા હતા જ્યારે વિરાટે માત્ર 94 બોલમાં 122 રનની અણનમ ઇનિંગ રમી હતી.
સદીની સાથે વિરાટે પોતાની ODI કરિયરમાં સૌથી ઝડપી 13000 રન પૂરા કર્યા. વિરાટે આ માઈલસ્ટોન હાંસલ કરવા માટે 267 ઈનિંગ્સ લીધી હતી. આ પહેલા સચિન તેંડુલકરે 321 ઇનિંગ્સમાં આ રેકોર્ડ બનાવ્યો હતો. આ સિવાય વિરાટે સુરેશ રૈનાનો રેકોર્ડ પણ તોડ્યો હતો. રૈના એશિયા કપમાં ભારત માટે સૌથી વધુ ત્રણ વખત પ્લેયર ઓફ ધ મેચ તરીકે પસંદ કરવામાં આવ્યો છે. ગઈકાલે વિરાટને ચોથી વખત પ્લેયર ઓફ ધ મેચ પસંદ કરવામાં આવ્યો હતો. કોલંબોના આ મેદાન પર વિરાટ કોહલીએ સતત ચોથી વખત સદી ફટકારી છે. ગઈકાલની મેચ પહેલા વિરાટ જ્યારે પણ આ મેદાન પર રમ્યો છે ત્યારે તેણે 110, 131 અને 128 રનની ઇનિંગ્સ રમી છે. એશિયા કપમાં સૌથી વધુ સદી ફટકારવાના મામલે વિરાટ હવે કુમાર સંગાકારા સાથે બીજા સ્થાને પહોંચી ગયો છે.બંનેએ એશિયા કપમાં અત્યાર સુધી 4 સદી ફટકારી છે. પ્રથમ સ્થાન પર શ્રીલંકાના સનથ જયસૂર્યા છે, જેણે એશિયા કપમાં 6 સદી ફટકારી છે.
વિરાટ કોહલી અને કેએલ રાહુલની જોડીએ પણ ઘણા રેકોર્ડ પોતાના નામે કર્યા.આ બંને ભારતની ત્રીજી જોડી છે, જેમણે ત્રીજા અને ચોથા નંબર પર બેટિંગ કરીને સદી ફટકારી છે. 1999માં પહેલીવાર રાહુલ દ્રવિડ અને સચિન તેંડુલકરની જોડીએ એકસાથે સદી ફટકારી હતી. આ પછી 2009માં ગંભીર અને વિરાટની જોડીએ સાથે મળીને સદી ફટકારી હતી. ગઈકાલે બંનેએ મળીને 233 રનની ભાગીદારી કરી હતી જે એશિયા કપની સૌથી મોટી ભાગીદારી બની ગઈ છે. આ પહેલા પાકિસ્તાનના પૂર્વ બેટ્સમેન મોહમ્મદ હાફીઝ અને નાસિર જમશેદે 2012માં ભારત સામે 224 રનની ભાગીદારી કરી હતી. આ સિવાય પાકિસ્તાન સામે ભારતની આ સૌથી મોટી ભાગીદારી પણ છે. તો ગઈકાલે ભારતે પાકિસ્તાનને એકતરફી રીતે હરાવીને એશિયા કપની ફાઇનલમાં જગ્યા બનાવવાનો પોતાનો દાવો વધુ મજબૂત કર્યો હતો.
